Senior

Eg var for ei stund sidan på seniorkino og såg filmen A complete unknown om den unge Bob Dylan. Og eg har fulgt senioruniversitetets i Åsane si foredragsrekke dette semesteret som vart avslutta med at dei pensjonerte lærarane Svein Olav Steindal og Tor Olav Sønnervik snakka om Dylan og framførte nokre av Dylans songar som dei hadde omsett til norsk (var vel eigentleg berre Steindal). Dylan-filmen var bra og Dylan-songane var slett ikkje verst omsett og framført. 

Men eg undrast på denne nemninga senior. Dei har eit eige parti Pensjonistpartiet som faktisk fekk 1,5% oppslutning ved kommunevalet i 2023 og er Norges 11. største parti. Men han som mest høglydt har gjort seg til sjølutropt talsmann for seniorsaken, er Stortingets eldste representant, Carl Ivar Hagen. Sjøl hadde eg ein gong i tida tittelen seniorkonsulent, men eg er ikkje sikker på at eg likar ordet senior og saken deira.  Sjølsagt likar eg billege kinobillettar, men er ikkje seniorar ei gruppe kravstore, bortskjemte ungar som skal ha 20 år med russetid før dei krev å få plass på ein sjukeheim.

Hagen er tre år yngre enn Bob Dylan. Mens señor Hagen sitt i ferieleiligheita si i Spania og sippar vin, legg Dylan ut på vegen på sin never-ending tour.  Allereie som 37 åring i 1978 satte Dylan seniorsaken på kartet, eller kanskje ikkje? Gisle Selnes skriv i si bok Den store sangen at "Undertittelen (Tales of Yankee power) antyder en politisk dimensjon av et slag som ikke skulle komme til å bli særlig fremtredende i Dylans produksjon de neste ti årene, mens teksten for øvrig balanserer - på profetisk vis - mellom erotisk lengsel og eksistensiell og religiøs undring." Ja vel, så er kanskje ikke mi omsetting heilt i den gata, men eg kunne ikkje dy meg.

Senior, senior

Kan du sei meg kor du skal hen

til Paradis eller Armageddon

Ka skal du bli når du blir stor

Kan du ‘kje svare meg på det, senior

Senior, senior

Kan du sei meg ka du skjule

i ei hytte eller ei hule

og koffor sletter du alle dine spor

Er du redd for dommens dag, senior

Du kan fortsette å lære sjøl om du har vorte pensjonist

Du kan fortsette å rase, javisst javisst

Du skriver med versaler om korleis det seg hør og bør

Du kan hevde med din pondus at alt var betre før

Senior, senior

Er det meir som du vil sjå

Har du sett ein mann med ljå

Har du rydda ut av ditt kontor

Som du veit er det no forseint, senior

Det siste som eg hugser før eg knelte ned og bad

at 70 er dei nye 50, det var det dei sa

at alder er eit tall, eit liv er berre år

og at tida er med og leger alle sår

Senior, senior

Har du hjarte hardt som stein

Er du tøffare enn John Wayne

Kanskje er det berre ein metafor

Kan du berre innrømme det, senior

Senior, senior

Det er på tide å rydde bordet

der er din tur å gripe ordet

Og etterpå spa på seks fot med jord

Er det  det som du venter på, senior

Originaltekst

Bob Dylan: Señor